Një urë e varur midis pemëve të çon në dhomën e re të Treehotel, hoteli i ndërtuar në Laponinë suedeze i përbërë nga tetë suita të dizajnuara nga po aq dizajner dhe artistë të famshëm.
Shtesa më e fundit në degët e pyjeve veriore suedeze është Biosfera, e projektuar nga Bjarke Ingels Group (BIG) e Danimarkës, që përdori 340 shtëpi zogjsh për të krijuar një dhomë hoteli që është unike në botë.
Biosfera është e vetmja suitë në botë që përbëhet nga 340 fole zogjsh. Instalimi fokusohet në qëndrueshmërinë dhe turizmin natyror të Treehotel-it i cili në këtë mënyrë kontribuon në ruajtjen e popullatës lokale të shpendëve. Me dizajnin e saj origjinal, Biosfera gjithashtu dëshiron të forcojë habitatin natyror të pyjeve suedeze.
Nga brenda Biosferës mund të shijoni një pamje mahnitëse në 360 gradë të pyllit. Pavarësisht hapësirës dhe ndikimit të reduktuar të strukturës në mjedis, dhoma ofron të gjitha komoditetet e një hoteli luksoz.
Suita e projektuar nga Bjarke Ingels Group shtrihet në një sipërfaqe të brendshme prej 34 metrash katrorë të varur nga toka dhe një tarracë çati që i zhyt vizitorët në majat e pemëve.
Hapësira plotësisht transparente ofron mundësinë për të përjetuar nga afër jetën e shpendëve vendas në një habitat ekologjik të pandotur.
Brenda dhomës së hotelit BIG ka hapësirë për një dhomë gjumi të madhe, një dhomë ndenjeje dhe një banjë komode me dush dhe sauna.
Ashtu si të gjitha objektet e tjera të Treehotel-it, shërbimet higjienike janë me djegie dhe sistemi i ujit është i qëndrueshëm. Mysafirët e hotelit “Treehotel” mund të qëndrojnë kështu në epiqendrën e natyrës dhe të fokusohen vetëm në bukurinë e mjedisit përreth.
