Dy sesione merkatoje, nga janari 2022 deri në gusht 2022. Tetë muaj dhe tetë përforcime. Në fakt do të ishin nëntë duke llogaritur Denis Zakaria, i cili zbarkoi në Torino në dimër dhe mbrëmë u transferua te Chelsea para “gongut” final. Përveç ndryshimeve, ai i Juventusit ishte një revolucion.

Drejtori sportiv Federico Cherubini, zv.presidenti Pavel Nedved dhe CEO Maurizio Arrivabene udhëtonin mesatarisht me një goditje në muaj. Pa folur për shpërthimin e Fabio Mirettit, i promovuar nga ekipi i dytë (në Serie C) në të parin. Nga Dusan Vlahovic, një pjesë e çmuar e dimrit, te Leandro Paredes, i fundit nga gjashtë përforcimet e verës.

Mesfushori argjentinas ka mbërritur të mërkurën, ditën e parafundit të merkatos dhe dje ka zhvilluar seancën e parë stërvitore në Continassa. “Jam i lumtur që ndodhem te Juventusi së bashku me këtë grup, në këtë klub, – tha ish-i i PSG-së. – Zgjodha numrin 32 sepse më dha shumë te Boca Juniors, Roma dhe Empoli. Unë kam dashur të jem këtu për një kohë të gjatë, jam i lumtur.

Siç u thashë miqve dhe familjes: Juve ose asgjë. Është ekipi im i ëndrrave. Kam shumë vite që kam mundësinë të vij këtu, këtë herë nuk doja ta humbisja. Dhe më pas është Di Maria, me të cilin kam një marrëdhënie të veçantë prej vitesh. Ne duam të vazhdojmë të fitojmë së bashku”.

Juve, nga 0 në 70
Paredes përfundon një revolucion të kryer në 243 ditë. Ish-superbomberi i Fiorentinës, 4 gola në 4 ndeshjet e para të kampionatit, ishte blerja më e shtrenjtë për kartonin (70 milionë plus 10 bonuse), i ndjekur nga ish-mbrojtësi i Torinos, Gleison Bremer (41 milionë plus 9 bonuse). Dy investime të kundërbalancuara si transferta falas; Angel Di Maria (ish-PSG, 28 trofe në karrierë) dhe Paul Pogba (ish-Manchester United, 4 kampionate në 4 vjet, në eksperiencën e parë te Juventusi, si dhe kampion bote me Francën).

Pastaj Filip Kostic, fitues i freskët i “Europa League” me Eintracht Frankfurt (12 milionë plus bonuse), është një përforcim me performancë dhe besueshmëri. Për dy lojtarë të nivelit ndërkombëtar si Arkadiusz Milik (i huazuar nga Marseille) dhe Leandro Paredes (i huazuar nga PSG) nevojitej gjithë kreativiteti i drejtorit sportiv Cherubini.

Federico Gatti, i marrë në Serie B dhe i promovuar në debutimin e tij në Serie A kundër Spezias, ka gjithçka për të qenë një intuitë sa guximtare, aq edhe e bukur (ish-Frosinone është gjithashtu i vetmi nënshkrim italian i 8 muajve të fundit). Denis Zakaria ktheu atë që ishte paguar; shumën e duhur (4 milionë plus 4 bonuse). Nuk është rastësi që në më pak se gjashtë muaj ai u ble fillimisht nga Borussia Monchengladbach dhe më pas u shit te Chelsea.

Tetë përforcime, 7 prej të cilave nën 30 vjeç. Nga 22 vjeç të Vlahovic në 34 të Di Maria, mosha mesatare e revolucionit janar-gusht është 27.3 vjeç. Por numrat që më shumë i interesojnë “Continassa” janë të tjerët. Falë, mbi të gjitha, shitjes së Matthijs De Ligt (te Bayern për 67 milionë plus bonuse), Juventusi ka grumbulluar gjithsej 94.5 milionë në tre muajt e fundit. Dhe lamtumirat, ndër të tjera, të Ramsey (ndërprerje kontrate) dhe Arthur (huazim te Liverpool) kanë përmirësuar situatën e pagave.

Sidoqoftë, transformimi i Juventusit të Massimiliano Allegri 2 nuk përfundon këtu. Mbyllet një merkato, hapet një tjetër. Në vitin 2023, nga janari në qershor, ndoshta nuk do të shohim një qasje të tillë. Me siguri, “shartimet” nuk do të mungojnë. Cherubini do të shikojë kryesisht majtas në vitin 2023.

Prioritetet janë një lojtar qendror, mbrojtës me këmbë të majtë (Bonucci, Bremer, Gatti dhe Rugani janë të gjithë me këmbë të djathtë) dhe një mbrojtës krahu për të zëvendësuar Alex Sandro, i cili do të lirohet në fund të sezonit dhe do t’i thotë lamtumirë Juventusit pas 8 sezonesh. Në rastin e parë, kushtojini vëmendje Gabriel (Arsenal) dhe Igor (Fiorentina), të cilët prej muajsh janë në krye të listave të Juventusit.

Gjithashtu Evan Ndicka (23 vjeç, në skadencë kontrate me Eintracht Frankfurt), si mbrojtës qendror dhe nëse është e nevojshme edhe në anën e majtë. Në të djathtë, megjithatë, do të varet nga vendimet e Di Maria dhe Juan Cuadrado (të dy në maturim). Gjithashtu nga rinovimi ose jo i Nicolò Zaniolo me Romën. Edhe ai mbetet në radarin e “Zonjës së Vjetër”.