Pirja e disa gllënjkave ujë gjatë stërvitjes nuk mjafton. Ja cilat pije të zgjidhni, sa dhe kur të pini për të shmangur dehidratimin kur stërviteni në verë, teksa temperaturat kapin rekorde.

Rëndësia e hidratimit – Hidratimi i mirë është i rëndësishëm, veçanërisht kur stërvitemi. Mosmarrja e lëngjeve të mjaftueshme para, gjatë dhe pas stërvitjes, veçanërisht nëse djersitni shumë, mund t’ju bëjë të dehidratuar. Dhe efektet nuk do të ishin të këndshme. Kur jemi të dehidratuar, në fakt vuan i gjithë trupi, që nga muskujt e deri te funksioni njohës me pasojë lodhjen dhe humbjen e motivimit. Të qenit i hidratuar, nga ana tjetër, na ndihmon të optimizojmë performancën e ushtrimeve. Por kini kujdes. Nuk mjafton vetëm të pish disa gllënjka ujë. Duhet të hidratohesh mirë, duke shmangur këto 5 gabime…

Gabimet e hidratimit kur stërvitemi – Përpara se të stërviteni ose të kaloni kohë jashtë, ekspertët rekomandojnë të pini një ose dy gota ujë dhe më pas të pini ujë çdo 10-15 minuta gjatë stërvitjes. Dhe, më pas, pini të paktën 0,5 litra pas stërvitjes. Në realitet, sasia varet nga aktiviteti. Sa më shumë djersitemi gjatë seancës stërvitore, aq më shumë lëngje do të na duhet të zëvendësojmë. Për më tepër, nëse do të shkojmë për një shëtitje të gjatë, vrapim ose not, mund të harrojmë të kemi ujë afër ose thjesht të mos kemi dëshirë të mbajmë një shishe. Gabim! Nuk është e sigurt që do të gjejmë një pije kur kemi etje dhe trupi na kërkon të hidratohemi.

Elektrolitet e humbura – Mesatarisht humbasim deri në gjysmë litri djersë çdo 30 minuta gjatë stërvitjes. Por sipas disa hulumtimeve, kjo shifër mund të jetë deri në katër litra djersë në orë, në varësi të shkallës metabolike. Djersa përbëhet kryesisht nga uji, por përmban edhe elektrolite të rëndësishme: natrium, klorur, kalium, magnez dhe kalcium. Elektrolitet janë minerale që gjenden në lëngjet e trupit si gjaku dhe urina dhe ndihmojnë në menaxhimin e një sërë funksionesh trupore, duke përfshirë thithjen e lëndëve ushqyese, heqjen e mbeturinave dhe shpërndarjen e ujit në trup. Prandaj, djersitja mund të na bëjë të humbasim elektrolitet, duke na lënë të dehidratuar dhe duke shkaktuar ngërçe të muskujve. Këshilla për ata që stërviten intensivisht për një orë ose më shumë (ose ushtrohen në vapë) është të mos kufizohen në ujë, por të konsumojnë pije për të zëvendësuar elektrolitet.

Përzgjidhni pijen e duhur – Një nga çelësat për të zëvendësuar elektrolitet e humbura është zgjedhja e pijeve tona sportive me kujdes. Lajmi i mirë është se shumë nga ato të disponueshmet në treg janë krijuar për të ruajtur ekuilibrin e elektroliteve të trupit tonë, kur djersitemi shumë. Ka edhe suplemente elektrolite, tableta për t’u përzier me ujë. Uji i kokosit është gjithashtu një zgjedhje e mirë, e cila sipas klinikës “Mayo” plotëson elektrolitet e humbura si kaliumi, natriumi dhe magnezi (përmbajtja e elektrolitit ndryshon sipas markës). Në vend të kësaj, shmangni pijet energjike që janë të pasura me kafeinë dhe sheqerna, të cilat mund të çojnë në rritje të presionit të gjakut, nervozizëm dhe madje edhe rritje të rrezikut të dehidrimit.

Duke mos marrë mjaftueshëm magnez – Si një elektrolit, magnezi ndihmon në rikthimin e hidratimit gjatë rikuperimit. Kjo është arsyeja pse ekspertët sugjerojnë të shtoni më shumë ushqime të pasura me magnez në dietën tuaj: bishtajore, arra, fara, drithëra, perime me gjethe jeshile, qumësht dhe kos. Suplementet e magnezit gjithashtu mund të sjellin disa përfitime në stërvitje, duke ndihmuar me ngërçet e këmbëve. Një hulumtim i botuar në revistën shkencore “Nutrients” thotë se suplementet e magnezit mund të na ndihmojnë të përmirësojmë performancën fizike, duke përfshirë forcën e kapjes dhe fuqinë e këmbës. Paralajmërim: Sipas Institutit Kombëtar të Shëndetit të SHBA-së për suplementet dietike, rekomandimi për magnez të plotësuar është 350 miligramë (mg) në ditë. Marrja e më shumë mund të shkaktojë diarre, vjellje dhe dhimbje barku. Suplementet e magnezit gjithashtu mund të ndërveprojnë me disa medikamente, duke përfshirë antibiotikët dhe ilaçet e refluksit acid (kështu që pyesni mjekun tuaj përpara se të merrni një suplement magnezi nëse jeni duke marrë ndonjë nga këto medikamente).

Pirja e alkoolit pas një stërvitjeje – Ora e lumtur pas stërvitjes? Më mirë jo. Pirja e alkoolit pas stërvitjes është e gabuar. Alkooli nuk përmban profilin e duhur ushqyes që duhet të ketë një pije rihidratuese. Në fakt, ajo kontribuon në dehidratim. Po birra? Nuk është një zgjedhje e mirë. Edhe pse ka birra të formuluara posaçërisht për të siguruar elektrolite, ato mund të ndihmojnë në përballimin e këtyre efekteve anësore.