Milani kalon raundin e Kupës së Italisë, duke mposhtur me penallti Torinon. Në “Rai Sport”, në fund të ndeshjes, trajneri kuqezi i kënaqur: “Ne nuk dorëzohemi asnjë centimetër, dimë të luftojmë, të shtrëngojmë dhëmbët. Një lojë e komplikuar edhe për shkak të cilësive të kundërshtarit. Në pjesën e dytë, mbi të gjitha, megjithatë mund ta shmangnim shkuarjen në kohën shtesë, por në fund të fundit është një fitore e dëshiruar dhe e merituar”.

Referuar lojës së Zlatan Ibrahimovic, në kthimin e tij në fushë pas 51 ditësh nga ndeshja e fundit, Pioli është i lumtur: “Ne vendosëm së bashku të luante që nga fillimi, për shkak të karakteristikave të tij. Nëse do të kishte hyrë në një lojë në zhvillim, mbase do të kishte dhënë edhe më shumë. Jam i kënaqur, megjithatë, me performancën e tij”.

Milani fiton dhe shkon në çerekfinale. Për Piolin është një kënaqësi dhe një vërtetim i mëtejshëm i cilësisë së punës së tij: “Unë jam mirë këtu në Milano, drejtuesit më kanë vendosur në kushtet më të mira për të punuar. Kur ndihem kaq mirë, është e qartë se përcjell qetësi për të gjithë grupin”. Hapësirë ​​edhe për merkaton: “Nëse ka vend për përmirësim, ne do ta bëjmë. Ka disa situata, le të shohim. Donnarumma? Nuk keni pse të pyesni mua për rinovimin e tij”.

Të rinjtë e Milanit fitojnë dhe bindin, teksa mungesa e publikut në fillim ishte një avantazh, siç pranon vetë trajneri: “Na mungon shumë tifozi ynë. Ndoshta në fillim, mungesa e tij ishte mirë për një ekip të ri, që nuk vihej nën presion. Ishte më mire atëherë, ndërsa tani brohoritjet e mbështetësve do të na jepnin një dorë të madhe”.