Fundi i një epoke: Wayne Rooney zyrtarisht largohet nga futbolli i luajtur për t’u përqëndruar plotësisht në rolin e tij si trajner i Derby County. Te skuadra në fjalë angleze ka qenë në rolin e dyfishtë, lojtar-menaxher, muajt e fundit.

Klubi ka komunikuar detajet e marrëveshjes me ish-kapitenin e Manchester United. Një kontratë 2.5-vjeçare, në përpjekje për të ringjallur skuadrën, aktualisht e treta nga fundi i Championship, divizioni i dytë i futbollit anglez.

Në realitet, karriera e Rooney si lojtar kishte përfunduar tashmë në nëntor, kur, pas largimit të Phillip Cocu, ai u thirr të kompozonte kuartetin që drejtonte skuadrën me Shay Given, Liam Rosenior dhe Justin Walker.

Që atëherë, Rooney nuk ka luajtur më, duke preferuar të menaxhojë taktikat dhe strategjitë nga pankina. Gjë që tani mund ta bëjë në autonomi të plotë, mbështetur nga tre të tjerët që u përmendën më lart, të cilët do të jenë pjesë e stafit të tij.