Aktori Tom Holland i thotë lamtumirë profileve të tij në rrjetet sociale dhe përshëndet pothuajse 68 milionë ndjekësit e tij në Instagram me një mesazh.

“Përshëndetje dhe mirupafshim…”, shkruan Tom Holland, duke njoftuar se do të bëjë “një pushim nga rrjetet sociale” për të ruajtur shëndetin e tij mendor.

Në një video, aktori britanik shpjegon arsyet që e çuan në këtë vendim: “Më duket se Instagrami dhe Twitteri janë tepër stimulues dhe mbytës. Jam shumë i përfshirë kur lexoj gjëra për mua”.

Tom Holland, i bërë i famshëm me rolin e “Spider Man”, hyn kështu në listën e atyre që kanë ndërmarrë të ashtuquajturin “detox digital”, nga Miley Cyrus te Taylor Swift, Pete Davidson apo Justin Bieber, apo një rrugë detoksikimi nga mediat sociale.

“Jam shumë i përfshirë”, vazhdon aktori në video: “Rrjetet sociale bëhen si një vorbull, ndaj më dëmton shumë shëndetin mendor. Kështu që do të bëj një hap prapa dhe do të fshij aplikacionet”.

Në mbishkrimin e videos, Tom Holland më pas shfrytëzon rastin për të folur për Stem4, “një nga organizatat bamirëse që The Brothers Trust (një organizatë bamirëse e shëndetit mendor e themeluar nga prindërit e Holland) është jashtëzakonisht krenare që e mbështet dhe kryen një punë fantastike”, shkruan ylli, i cili më pas fton ndjekësit e tij të shikojnë videon e tij dhe ta ndajnë atë me këdo që ndihet i sintonizuar:

“Ka një link në biografinë time te The Brothers Trust Shop, ku mund të blesh një këmishë dhe të na ndihmosh të vazhdojmë t’i ndihmojmë këto bamirësi të mrekullueshme të lulëzojnë. Unë të dua dhe flas për shëndetin mendor”.

Një mesazh nga Tom Holland që është edhe një ftesë për të rinjtë që të kërkojnë ndihmë për të mos lënë veten të hyjnë në spiralen e postimeve dhe videove.

“Shëndeti mendor mbetet ende një tabu. Unë e kuptoj që është e vështirë të kërkosh ndihmë dhe nuk duhet të jetë diçka që na bën të ndihemi në siklet, dhe gjithashtu e di që është më e lehtë me fjalë sesa në realitet”.